Македонската А репрезентација утре од 18:00 часот на Националната арена „Тодор Проески“ во Скопје ќе се соочи со Лихтенштајн во квалификациите за Светското првенство. Со реми натпреварите против Велс и Белгија зад себе, нашите фудбалери имаат јасна задача — победа за скок на врвот на табелата.
Капитенот на репрезентацијата, Енис Барди, очекува тежок меч, но и триумф.
„Мислам дека ќе имаме тежок натпревар, така беше и во Вадуц додека не го отворивме резултатот. Сите сме свесни што нè очекува, направивме анализа и знаеме што треба да поправиме. Подготвени сме за дуелот, а три бода можат многу да ни значат за да го завршиме овој прозорец на првото место. Секогаш кога играме за Македонија, мотив не е потребен — победата е нашата единствена цел.“
Македонија ја совлада Лихтенштајн со убедливи 0:3 на првиот меѓусебен дуел, а утрешниот натпревар е шанса пред домашната публика да се потврди фаворитската улога и да се запишат драгоцени бодови.
