Екипата на Куманово со многу мака и голема драма стигна до победа над Радовиш со 34-32, во дуелот од првото коло на новата ракометна Суперлига. Мечот во реновираната сала во Куманово донесе возбудлив ракомет, чести пресврти и неизвесност до самиот крај.
Радовиш подобро го отвори натпреварот и благодарение на расположените Постолов и Каковски во повеќе наврати имаше предност од три гола. Сепак, кумановчани, предводени од Ончев, Стојков и Димевски, успеаја да се вратат и на полувреме заминаа со негатива од два гола (15-17).
Во продолжението се играше гол за гол, а на десет минути до крај резултатот беше израмнет (28-28). Во клучните моменти подобро се снајдоа избраниците на тренерот Аце Станковски, кои ја искористија поддршката од публиката и со серија на голови стигнаа до важна стартна победа.
Најефикасен во редовите на Куманово беше Тоше Ончев со 10 гола, Стојков додаде 8, а Димевски 7. Кај Радовиш се истакнаа Здравко Постолов со 9 и Бобан Каковски со 7 погодоци.
