Македонската А репрезентација денес од 18:00 часот на Националната арена „Тодор Проески“ во Скопје ќе го пречека Лихтенштајн во рамки на квалификациите за Светското првенство. По реми дуелите со Велс и Белгија, нашите фудбалери ќе се обидат да ја остварат првата домашна победа во циклусот.
На официјалната прес-конференција, селекторот Благоја Милевски ја потенцираше фаворитската улога на Македонија, но и важноста од максимална сериозност:
„Сите играчи се здрави и подготвени. Имаме максимален респект за Лихтенштајн и воопшто нема да биде лесно. Додека сум селектор, никогаш нема да потценам ниту еден противник. Нашата цел е јасна — три бода кои се исклучително важни во моментов. Задоволен сум од изданието на фудбалерите кои дебитираа против Саудиска Арабија. Лука Станковски, Елмин Растодер и Решат Рамадани покажаа дека имаат квалитет и, се разбира, сметаме на нив и на натпреварите за бодови.“
За Македонија ова ќе биде втора пресметка со Лихтенштајн во групата, по гостинската победа од 0:3 во Вадуц, а „црвено-жолтите“ ќе ја бркаат првата домашна радост за квалификациски бодови.
