Ракометарите на Еурофарм Пелистер по третпат во историјата го освоија Суперкупот на Македонија, откако во драматичен финиш го совладаа големиот ривал Вардар 1961 со 28-27 (12-13) во Кавадарци.
Мечот понуди вистински ракометен спектакл со многу пресврти, исклучувања и пенали. Вардар подобро го отвори натпреварот и имаше водство од четири гола (9-13), но пелистерци успеаја да се вратат и на одмор заминаа со минимален минус.
Во второто полувреме битолчани играа поангажирано и поведоа со 26-22 десет минути пред крајот. Сепак, вардарци не се предадоа – со серија на голови преку Јанковски и Талески стигнаа до израмнување 27-27 во последната минута.
Токму тогаш, тренерот на пелистерци Гарабаја повика тајм-аут и ја подготви последната акција. Херој на вечерта стана Усама Хосни, кој со гол во последните секунди му донесе нов трофеј на својот тим.
Со овој триумф, Еурофарм Пелистер ја продолжи доминацијата над Вардар – четврта победа по ред и јасна најава дека битолчани повторно ќе атакуваат на титулата оваа сезона.
