Македонската тениска надеж, 15-годишната Сара Митевска, на импресивен начин ја освои својата втора турнирска титула во категоријата до 18 години. Таа викендов триумфираше на J30 Скопје – Pointer Tennis Park Open 2025, совладувајќи ја во финалето Гркинката Деспоина Коскина со 2-0 во сетови (7:5, 6:1).
Митевска продолжи со одличните настапи во домашна конкуренција, откако и претходниот турнир во оваа возрасна категорија го освои на терените на Тенис Парк во Скопје.
Турнирот го започна блескаво, без загубен гем во првите две кола: 2-0 (6:0, 6:0) против Србинката Дуна Милиќ и Украинката Стефанија Карпаиук. Во четвртфиналето нејзината противничка се откажа при водство од 3:0 за Митевска во првиот сет, а во полуфиналето таа беше поуспешна од Елена Пападопулу од Бугарија, со која настапуваа заедно во конкуренција на двојки.
Во двојки, пак, македонската тенисерка Зара Зафировска заедно со Коскина од Грција стигнаа до финалето, каде беа поразени од украинската двојка Стефанија Карапалиук и Никол Нериа.
