Меморијалниот турнир „Крсте Андоновски“ во Охрид од година во година станува сè поквалитетен и поатрактивен за љубителите на ракометот. Ова издание брои осум силни екипи, меѓу кои три национални шампиони – Еурофарм Пелистер, Партизан и Киндол, поранешниот европски првак Вардар 1961, засилениот Охрид, како и Нексе Нашице, Тримо Требње и Динамо Панчево.
Сепак, организаторот РКГ Охрид, заедно со локалната самоуправа, веќе размислува за промени во форматот на натпреварувањето. Од следната сезона можно е турнирот да се игра со шест екипи наместо со досегашните осум. Оваа идеја е дел од стратешката визија за концентрирање на квалитетот и обезбедување уште поатрактивни дуели.
За изданието во август 2026 година веќе се потврдени две големи имиња, тоа е поранешниот европски првак Загреб и германскиот Вецлар, бундеслигаш во кој настапуваа македонските ракометари Филип Миркуловски и Филип Кузмановски.
Со автоматското учество на домаќинот Охрид, веќе се познати половина од учесниците, а останатите три места ќе бидат распределени меѓу клубови од Македонија, регионот и Европа.
Организаторите најавуваат уште поинтересно и подинамично натпреварување, кое има за цел да ја зголеми препознатливоста и престижот на турнирот. Во првите три изданија, пехарот го освојуваа Тиквеш, Еурофарм Пелистер и Вардар 1961.
Сосема извесно, „Крсте Андоновски“ станува една од најзначајните предсезонски спортски манифестации во регионот, привлекувајќи врвни тимови и љубители на ракомет од цела Европа.
