Македонската репрезентација до 16 години запиша уште една убедлива победа во контролниот двомеч против Црна Гора. На вториот натпревар одигран на стадионот „Билјанини извори“ во Охрид, нашите млади надежи славеа со високи 5:0 и на тој начин ја потврдија својата надмоќ.
Херој на мечот беше напаѓачот Медин Емини, кој постигна дури четири погодоци. Првиот го реализираше во 22. минута по асистенција од Адеми, а вториот на пет минути пред крајот на првото полувреме за предност од 2:0. Во вториот дел продолжи шоуто на Емини – со гол во 41. минута тој запиша хет-трик, а во 61. минута одзеде топка од противничкиот дефанзивец и со прецизен удар ја погоди празната мрежа за 4:0.
Конечните 5:0 ги постави Стефан Ристиќ во 77. минута, кој по убав продор на Крстевски ја затресе мрежата на гостите.
Селекторот Исејни направи неколку измени во стартниот состав во споредба со првиот натпревар, кој Македонија исто така го доби со 3:0, но и покрај тоа нашите млади фудбалери повторно покажаа доминација и целосна контрола на играта.
Со двата триумфа против Црна Гора, генерацијата У16 покажа дека располага со голем потенцијал и талентирани фудбалери кои претставуваат светла иднина за македонскиот фудбал.
