Младиот македонски тенисер Марко Алексовски продолжува со успешните настапи на турнирите на кои учествува како дел од тимот на ITF-Tennis Europe, финансиран од Grand Slam Development Fund. По освоеното прво место на турнирот во Барселона изминатиот викенд, Алексовски продолжи со победи и на турнирот „Давид Ферер“ што се игра во Аликанте, Шпанија.
Во првото коло, тој убедливо го совлада Австриецот Александер Цош со 2-0 во сетови (6:1, 6:0), додека во второто коло триумфира над домашниот тенисер Пау Лозано Ортега со 2-1 во сетови. Поразот во првиот сет за Алексовски беше 4:6, но следните два сетa ги освои убедливо со 6:1 и 6:0.
Денеска, во трето коло, Алексовски ќе се соочи со полскиот тенисер Јан Марсели Липка.
Турнирот во Аликанте е од категорија 1 за тенисери и тенисерки до 14 години и е на исто ниво како турнирот во Барселона, кој Алексовски го освои минатиот викенд. Пред тоа, тој беше полуфиналист на турнир во Белгија.
