Викендов стартуваше новата сезона во Првата женска фудбалска лига. Во првото коло главно фаворитите забележаа убедливи победи.
Актуелниот шампион, ЖФК Љуботен, на домашен терен ја декласира екипата на ЖФК Истатов со убедливи 5:0. Стрелци на головите беа Хава Мустафа во 57. минута за 1:0, потоа Ајури Тераваки постигна еден гол, додека два гола на Охадиве Мариан Огочукву и еден на старо-новото засилување Јулија Живиќ ја заокружија убедливата победа.
Во Скопје, екипата на ЖФК Скопје со 3:0 го совлада новиот прволигаш, ЖФК Кочани. Резултатот го отвори Мила Панева во 34. минута, а останатите два гола беа дело на Крстева Кристина и Бесарта Фиде.
На гостински терен, ЖФК Каменица Саса ја совлада екипата на ЖФК Речица со 3:1. Два гола за победничкиот тим постигна капитенката Ана Димитровска, а еден гол додаде Фрагосо Туане Де Соуза. Единствениот гол за домаќинките беше дело на Митковска Емилија во 56. минута.
Највисока победа во првото коло забележа ЖФК АС Јунајтед, која на домашен терен со 8:0 го совлада ЖФК Атлетико. Веса Села и Теодора Далческа се радуваа на хет-трик, додека останатите два гола беа дела на Оливера Цоклеска и Речи Ихдина.
Најнеизвесниот меч од колото се одигра помеѓу екипите на ЖФК Топ Гол и ЖФК Тиверија Брера. На полувреме битолчанки заминаа со минимални 1:0 по голот на Петковска Емилија, но во второто полувреме Тиверија Брера со головите на Ивана Илиева и Пецева Розита успеа да го преокрене резултатот и да забележи прва победа во сезоната.
