Охрид и оваа година ќе биде центарот на квалитетниот ракомет, каде почнувајќи од утре- 19 Август, па сè до 23 Август ќе се одржи традиционалниот турнир „Крсте Андоновски“.
Вкупно осум екипи ќе се борат за титулата, а натпреварите ветуваат голема доза на возбудување.
Домашната ракометна сцена ќе биде претставена од Охрид- како организатор, како и од македонските гиганти – Еурофарм Пелистер и Вардар.
Меѓу странските учесници повторно ќе ги гледаме добро познатите српски тимови – Партизан и Динамо Панчево, како и хрватскиот Нексе Нашице. Свој настап ќе има и екипата Киндил од Фарските Острови, а турнирот ќе биде збогатен и со учеството на словенечкиот Тримо Требње, како замена за грчки АЕК.
Групите се веќе формирани:
• Група А: Охрид, Партизан, Нексе и Киндил
• Група Б: Вардар, Еурофарм Пелистер, Тримо и Динамо Панчево
Кулминацијата на турнирот ќе биде на 23 август, кога од 20:00 часот е закажано големото финале.
