Младиот македонски тенисер Марко Алексовски постигна огромен успех на турнирот во Барселона (за играчи до 14 години), освојувајќи го шампионскиот пехар. На патот до титулата тој во последните три меча елиминира тројца од првите четири носители и сосема заслужено стигна до трофејот.
Во денешното финале на престижниот „Антонио Хернандез Куп“ (категорија 1), Алексовски славеше против вториот носител, Шпанецот Стефан Шангичев. Ривалот го доби првиот сет во тај-брејк со 7-6 (8:6), иако Марко имаше три сет-топки. Но, тоа не го поколеба младиот македонски талент – напротив, во вториот сет заигра уште поагресивно и поведе со 3-0 во гемови, по што Шангичев го предаде мечот.
На патот до финалето, Алексовски во полуфиналето го совлада четвртиот носител, Јаков Мазин, додека во четвртфиналето беше подобар од првиот носител, Португалецот Франциско Сардиња.
Алексовски е дел од тимот на ITF-Tennis Europe, кој е финансиран од Grand Slam Development Fund. Пред една недела играше полуфинале на турнирот во Белгија, а веќе следната недела ќе настапи на нов турнир во Аликанте, Шпанија.
