Македонските одбојкарски интернационалци продолжуваат со одлични настапи ширум Европа, бележејќи значајни резултати и во клупските натпреварувања.
Репрезентативецот Александар Љафтов со својот тим Елоре го освои сребрениот медал во Средноевропската МЕВЗА лига, откако во драматично финале загубија од Мурса со 3:2. Натпреварот траеше 131 минута, а Елоре успеа да се врати од негатива од 2:0 во сетови, но сепак не стигна до трофејот. Љафтов во финалето реализираше шест поени. Неговиот тим сега фокусот го насочува кон домашното првенство, каде се на врвот на табелата и важат за главни фаворити за титулата.
Капитенот на македонската репрезентација, Никола Ѓоргиев, со Карловарско го заврши регуларниот дел од сезоната во чешката Екстра лига на првата позиција. Во последното коло славеа против Брно со убедливи 3:0, а Ѓоргиев беше прогласен за МВП со 19 освоени поени. Карловарско сега влегува во плеј-оф фазата како лидер и еден од главните кандидати за шампионската титула.
Поранешниот репрезентативец Ристо Николов со својот Нефелс обезбеди финале во плеј-офот на швајцарското првенство, откако во полуфиналето го совладаа Шеноис со 3:1. Николов одигра цел натпревар и запиша шест поени. Воедно, тој е втор најдобар блокер во лигата со 48 блокови, веднаш зад Џоел Хаук од Амрисвил. Нефелс ќе игра финале и во Купот, токму против Амрисвил, додека во плеј-оф финалето ќе се соочи со победникот од дуелот меѓу Амрисвил и Шоненверт.
Во тренерските води успешно се снаоѓа и поранешниот репрезентативец Ѓоко Јосифов, кој како стратег на Валдфиртел избори пласман во полуфиналето на плеј-офот во Австрија. Неговиот тим во четвртфиналето го елиминираше Грац со две победи од по 3:1, а следен предизвик ќе биде Хартберг, кој претходно им го попречи патот до Куп финалето.
