Македонските млади тенисери имаа успешен настап на меѓународниот турнир Neotel Open 2025, кој вчера заврши во Скопје и се одржа за тенисери и тенисерки до 16 години.
Во машката конкуренција во двојки, Александар Грујиќ, заедно со својот партнер Кристијан Стефанов од Бугарија, го освоија трофејот. Тие во финалето со сигурни 2-0 во сетови (6-3, 6-2) ги совладаа вторите носители – Стефан Мојсејев од Србија и Диого Филепе Силва Ордоњо од Португалија.
На патот до титулата, во полуфиналето ја совладаа двојката Давид Грабул (Македонија) и Задиг Добринине (Франција) со 2-0 (6-3, 7-5), додека во четвртфиналето беа подобри од Лука Кировски (Македонија) и Лука Глуцк (Германија), исто така со 2-0 (6-3, 6-2). Најтешкиот натпревар го имаа во второто коло, кога во три сета (4-6, 7-6, 10-3) ги совладаа Германците Матијас Гетинг и Аурелиус Херц.
Кај девојките, Сара Митевска блескаше во поединечната конкуренција и стигна до големото финале. Таа на својот пат ги победи Ирис Димопулу од Грција (6-1, 6-0), Ангелина Вишеневска од Украина (6-2, 6-0), Софија Сарач од Австралија (6-3, 6-2) и Дионисис Кукули од Грција (6-3, 6-1).
Во финалето, Митевска беше поразена од кинеската тенисерка Фангју Шанг со 2-0 во сетови (6-3, 6-1), но нејзиниот настап останува за почит.
