ГРК Охрид продолжува со стратегијата на подмладување и афирмација на своите млади надежи, пријавувајќи уште тројца талентирани ракометари од сопствената школа за настап во Суперлигата и ЕХФ Европскиот Куп во сезоната 2025/26.
По неодамнешното потпишување на професионален договор со бекот Илија Трајчески, кој веќе се наоѓа во тренажен процес со првиот тим, управата на клубот одлучи во сениорскиот состав да им даде шанса и на следниве тројца млади ракометари – голманот Бојан Крстевски, кој има 17 години, а е висок 185 цм, Матео Сиљановски кој игра како среден бек, има 17 години, висок 182 цм и Христијан Пупунцоски, 17-годишно лево крило, а кој е висок 181 цм.
Сите тројца се производ на младинската школа на клубот, а нивното приклучување кон првиот тим претставува потврда за сериозната заложба на Охрид да гради стабилна и долгорочна основа за идни успеси, како на домашната сцена, така и во европските предизвици.
Оваа сезона клубот ја започнува со целосно освежен тим и ново поглавје под водство на српскиот стратег Борис Ројевиќ. Подготовките за сезоната се веќе во тек, а базичниот дел ќе се реализира во Охрид. Во рамки на подготвителниот период, охриѓани ќе настапат и на неколку силни турнири, меѓу кои се Струшкиот турнир и домашниот „Крсте Андоновски“, каде Охрид ќе има и улога на организатор.
Со ваков пристап, Охрид не само што гради конкурентен тим за тековната сезона, туку и јасно ја демонстрира визијата за иден развој преку силна поврзаност со својата младинска школа.
