Женскиот ракометен клуб Куманово продолжува со градење на силен и конкурентен тим за претстојната сезона во Женската Супер лига. Една од клучните ракометарки, кружниот напаѓач Марија Петреска, потпиша нов едногодишен договор со клубот и ќе ги брани боите на Куманово и во сезоната 2025/26.
22-годишната стружанка, која претходно го носеше дресот на ЖРК Металург од Автокоманда, веќе се наметна како важен дел од тимот на стратегот Славиша Димитријески. Со својата борбеност и спортска зрелост, Петреска се очекува повторно да биде една од ударните сили на кумановскиот состав.
Со продолжувањето на соработката со Марија Петреска, управата на клубот покажува јасна визија за континуитет и стабилност. Претходно беа обновени договорите и со неколку други клучни ракометарки: Јасна Трајковиќ, Мила Мемов, Ангела Шехтанска, Росана Павлова, Нена Нестороска и Никита Антевска.
Куманово ова лето се засили и со интернационални имиња, меѓу кои се средниот бек Маријана Азеведо и десниот бек Аманда Стеин, а под голот ќе стојат новите голманки Ана Марија Горговска и Симона Грујовска.
Сепак, клубот се соочи и со одредени заминувања – Ана Михајловска се пресели во Вардар, а Марија Јовановска го засили шампионот Ѓорче Петров.
Куманово во новата сезона влегува со високи амбиции, а продолжувањето на соработката со ракометарки како Марија Петреска е силен показател за посветеноста и желбата за трофеи.
