Дарко Коцев, искусниот и високообразован кондиционен тренер од Радовиш, започна ново интернационално поглавје во својата кариера, приклучувајќи се како кондиционен тренер на репрезентацијата на Кувајт до 16 години. Коцев, кој има 40 години, веќе направи силно име во македонскиот спортски свет, важи за еден од најдобрите во својата област, познат по својата професионалност и посветеност.
Во својата богата кариера, тој беше кондиционен тренер на прволигашот Брера Струмица четири сезони, а исто така и шеф на стручниот штаб на ФК Плачковица од неговиот роден град Радовиш, како и координатор на младинските категории во клубот.
Работел и со РК Радовиш, особено во припремените периоди за подигнување на физичката форма на играчите, а истовремено се истакна и во индивидуална работа со спортисти од различни дисциплини.
Коцев поседува UEFA Fitness A диплома, UEFA SHERE диплома и UEFA B тренерска лиценца, што ја потврдува неговата компетентност и стручност на високо ниво, Коцев е магистер по кинезиологија.
Искусниот кондиционен тренер беше во Чешка, каде заедно со младата репрезентација на Кувајт го одработи првиот подготвителен камп во Прага.
„Бевме на припреми во Прага, Чешка две недели. Овде е многу професионално, одлична организирана средина. Добро се адаптирам. Целите овде се 2026 квалификации во азиската лига. Предизвикот е голем, во друг свет со друга култура“, изјави Коцев во ексклузивна изјава за Спортска Мрежа.
Ова е значаен чекор за македонскиот стручњак, кој ја продолжува својата спортска приказна на меѓународната сцена и претставува вистински амбасадор на македонскиот спорт во светот.
Во следниот период Спортска Мрежа најавува емисија во која ќе гостува Дарко Коцев, ќе зборуваме на многу фудбалски теми, наскоро најава за неговото гостување во Спортска Мрежа Podcast.
