Македонскиот тенисер Калин Ивановски го заврши својот настап на ИТФ турнирот во Куршумлијска Бања со пласман во четвртфиналето, откако денеска беше принуден да го предаде мечот против првиот носител Свјатослав Гулин поради повреда.
Натпреварот заврши во вториот сет при резултат 1-0 во сетови за Гулин и 3:1 во гемови. Во првиот сет, по израмнувањето на 1:1, рускиот тенисер направи серија од пет последователни гема и го освои сетот со убедливи 6:1. Во вториот сет, Ивановски поведе со 1:0, но потоа Гулин освои три гема по ред. При резултат 3:1 и по само еден одигран поен во петтиот гем, Ивановски реши да се повлече од натпреварот.
И покрај повредата, Ивановски се наоѓа на списокот на пријавени играчи и за наредната недела, повторно на турнирот во Куршумлијска Бања. Сепак, останува да се види дали ќе биде подготвен за настап.
