Во недела ќе се одиграат мечевите од седмата рунда на Втората лига, по што ќе следува репрезентативна пауза, која дел од второлигаши и прволигаши ќе ја искористат за одигрување на пријателски натпревари.
Дербито на колото од седмата рунда ќе се одигра во Штип, каде на Градскиот стадион ќе се соочат Брегалница и Кожуф, дерби дуел каде гостинот од Гевгелија ќе го предизвикува лидерот Брегалница во обид да го совлада среде Штип и со тоа да дојде до ситуација да застане на врвот.
Всушност ова ќе биде соочување на засега двете непоразени екипи во второлигашкото друштво. Брегалница на Трајче Сенев, кој пак е всушност поранешен тренер токму на Кожуф има скор од четири победи, две ремија и вкупно 14 бодови со гол разлика од девет постигнати погодоци и четири примени.
Кожуф низ овие шест одиграни натпревари забележа три победи и три ремија со 13 постигнати и седум примени погодоци за вкупно 12 бодови и четврто место на табелата.
Всушност Кожуф го има најефикасниот напад кој е предводен од најдобриот стрелец во лигата Дарко Грозданоски со седум погодоци.
За Сенев предност ќе биде што многу добро го познава Кожуф, ја знае хемијата и самата атмосферата, од друга страна предност за штипјани ќе бидат и поранешните играчи на Кожуф, кој во Гевгелија работеа со Сенев, како Бојан Иванов, Џихан Адили и Грегори Давков.
Домашниот терен и домашната публика ќе бидат предност за Брегалница, која ќе се потпира и на одличната одбрана која прими само четири погоди на шест меча, што ја прави втора најдобра одбрана после онаа на Башкими која прими само три погодоци.
- МЕЃУСЕБНИ ДУЕЛИ НА БРЕГАЛНИЦА И КОЖУФ:
Во однос на меѓусебните дуели двете екипи се имаат соочено на 14 натпревари, од кои четири пријателски и десет во рамки на Втората лига, меѓусебни дуели од 26. септември 2017 до 23. март 2024 година кога двете екипи одиграа пријателски меч.
Брегалница доминира во меѓусебните дуели со десет победи во однос на Кожуф кој само еднаш триумфирал, а пак три средби завршиле без победник.
Ако и се верува на традицијата тогаш во Штип би требало да очекуваме помеѓу два и три погодоци.
Триумф за Брегалница ќе значи дека штипјани ќе останат на врвот од табелата и ќе ја продолжат мисијата за експресно враќање во Првата лига, а пак триумф за Кожуф може да значи и прво место пред репрезентативната пауза, но под услов ако Башкими и Македонија ЃП кикснат што ќе биде тешко, но како велат, фудбал, никогаш ништо не се знае.
Мечот меѓу Брегалница и Кожуф се игра на Градскиот стадион во Штип, в недела од 14 часот.
