Македонската тенисерка Лина Ѓорческа успешно го започна настапот на ИТФ турнирот во Ашафенбург, Германија, кој се игра за награден фонд од 40.000 долари. Во првото коло таа ја совлада домашната претставничка Јоси Димс со 2-0 во сетови, 6:3 и 7:6 (7:5), по 100 минути игра.
Ѓорческа беше поефикасна во реализацијата на брејк топките (6/8), за разлика од Димс која искористи 5 од 9 можности. Македонската тенисерка освои вкупно 74 поени, десет повеќе од противничката (64).
Првиот сет мина во знакот на Ѓорческа која брзо ја презеде контролата и го затвори со 6:3. Во вториот сет водството неколку пати менуваше страна, но Ѓорческа остана смирена и во тај-брејкот поведе со 4:1, па 6:3, за конечно да ја искористи третата меч-топка и да обезбеди пласман во второто коло.
Во следната рунда Ѓорческа ќе се сретне со втората носителка на турнирот, Хрватката Тара Вурт, која во првото коло ја елиминираше Германката Теса Јохана Брокман со 2-0.
