Македонскиот фудбалски стратег Ѓоко Хаџиевски е новиот шеф на стручниот штаб на бугарскиот Спартак Варна. Искуствениот 70-годишен тренер ќе го наследи Николај Киров, кој неодамна го презеде водството на Ботев Пловдив.
Хаџиевски има богата и разновидна тренерска кариера што трае речиси четири децении, со ангажмани во неколку земји и на различни континенти. Познат е по својот тактички пристап, дисциплина и способност да работи во различни услови и фудбалски средини.
Ова не е негово прво искуство во бугарскиот фудбал. Уште во сезоната 1993/94 го водеше гигантот ЦСКА Софија, додека во 2006 година повторно се врати во Бугарија, како тренер на Вихрен Сандански. И како играч и како тренер има доста искуство во фудбалот во и надвор од Македонија.
Неговиот последен ангажман беше во Саудиска Арабија во сезоната 2023/24, а низ својата долга тренерска кариера стои зад кормилото на многу клубови како Пелистер, Вардар, Беласица, Војводина (Србија), Баку (Азербејџан), Касторија и Атромитос (Грција), Докса (Кипар), Хата, Хаџер, Наџран како и селектор на македонската репрезентација.
Со своето искуство и авторитет, Хаџиевски ќе се обиде да донесе стабилност и резултати во редовите на Спартак Варна, клуб кој има амбиции за повисок пласман и враќање на старите сјајни денови.
