ЖФК Билјанини Извори продолжува со екипирање за новата сезона во Втората женска фудбалска лига во која клубот од Охрид ќе цели кон освојување на првото место и конечно враќање во Првата женска фудбалска лига.
Поранешниот шампион на Македонија го претстави второто засилување се работи за искусната Јана Ацковска, која доаѓа од редовите на второлигашот Слободен од Скопје.
24-годишната фудбалерка кариерата ја започна во Скопје, потоа беше дел од Истатов, па се врати одново во Скопје, по што продолжи во велешки Борец, а потоа кариерата ја продолжи во Слободен, кој годинава како дебитант настапи во Втората женска фудбалска лига.
„Веруваме дека нејзиното присуство ќе донесе дополнителна цврстина во играта и позитивна атмосфера. Заедно сме посилни – чекор по чекор, кон нови победи“, велат од ЖФК Билјанини Извори по промоцијата на Ацковска.
Ацковска е четирикратен државен првак, но потоа следуваше повреда на лигаментите, по што се приклучи на ЖФК Слободен и за овој клуб ги одигра сите натпревари и беше вистински лидер во тимот и своето искуство го пренесуваше на младите фудбалерки.
“Многу ми беше мило што играв за екипа како ЖФК Слободен Скопје, ние повторно ќе се дружиме, но јас имам ретка шанса повторно да се вратам и да играм на професионално ниво. Сите од тимот и тренерот Ангел, сите бевте супер коректни со мене. Играчите на ЖФК Слободен се млади и на повеќето ова им беше прва сезона, и ние сигурно ќе играме пак заедно во годините кои доаѓаат”, рече Ацковска за клупската страна на ЖФК Слободен по нејзиното заминување.
Во следниот период ЖФК Билјанини Извори ќе престави уште неколку нови засилувања со кои ќе го подига квалитетот во своите редовите за остварување на својата цел во следната сезона.
