Вечерва беа одиграни нови четири натпревари од Меѓуопштинскиот турнир во мал фудбал „Ресен 2025“, а истите понудија многу борба на теренот, погодоци и неизвесност на големо задоволство на големиот број на публиката во салата во Ресен.
Во првиот меч екипата на ФК Ресен беше поразена од тимот на Аце Најдески со резултат од 1:2 во еден неизвесен меч со многу шанси и на двете страни.
На вториот меч немаше победник, откако Нана Фруид Солар Буилд ремизираше со Хризантема играјќи 2:2, но со ваков резултат екипата на Хризантема има обезбедено „билет“ за во четвртфиналето.
Веќе во третиот меч публиката виде многу погодоци, дури шест, за убедлив триумф на Здружение на возачи од 4:2 над Крушево.
Во последниот натпревар тимот на Кафе Бар 9 со сигурни 2:0 беше подобар од составот на Враништа.
Посетеност и вечерва беше на високо ниво, а овој турнир важи за еден од подобро организираните и привлекува екипи од целиот регион.
Спортска Мрежа е медиумски покровител на Меѓуопштинскиот турнир во мал фудбал „Ресен 2025“.
