Победа на стартот од Европското првенство за тенисери и тенисерки до 16 години, кое започна вчера во Парма, Италија за македонскиот тенисер Кристијан Јанев.
Македонија на ЕП покрај Јанев ја претставуваат и Максим Треневски кај момчињата, кај девојчињата Миа Спровска и Ива Велковска.
Успешен старт имаше Кристијан Јанев, кој со 2-1 во сетови славеше над Давит Похосјан од Ерменија и во следната рунда ќе игра со победникот од мечот меѓу Кен Инк од Естонија и Жига Шешко, репрезентативец на Словенија.
Максим Треневски во првото коло е поразен од Омер Шамиан од Израел со 2-0 во сетови. Девојките се поразени во стартното коло, откако Миа Спировска загуби од Камила Черноусова од Летонија со 2-0 во сетови, а со истиот резултат Ива Велковска беше поразена од Ванеса Влахова од Бугарија.
Во конкуренција на двојки Јанев и Треневски во првото коло за противници ги имаат Леонардо Љубичиќ и Лени Пети од Монако, додека Спировска и Велковска ќе играат против врсничките од Италија Илари Пистола и Вирџинија Проиети.
