Академија Пандев Брера Струмица продолжува да ја потврдува својата репутација како една од најуспешните фудбалски школи во земјава. Младинскиот состав У19 ја освои КУП титулата за сезоната 2024/2025, откако во финалето убедливо ја совлада Брегалница од Штип со 4:0. Избраниците на Ѓорѓе Стојчев прикажаа целосна доминација на теренот, со што испратија силна порака дека се иднината на првиот тим.
Победата беше најавена уште во првото полувреме со водство од 1:0, додека во вториот дел следеа уште три гола, од кои два беа дело на Бобан Кузмановски и Давид Ристовски, а дополнителен погодок дојде како резултат на авто гол на противникот.
„Ова генерација фудбалери се и вицешампиони откако за три бода не успеа да ја освојат титулата. Станува збор за играчи кои веќе настапуваат во првиот тим но од следната сезона ќе го имаат и главниот збор во сениорските води. Горд сум на овие момци и од срце им посакувам само успеси“, изјави Ѓорге Стојчев, тренер на екипата У19.
Успесите не застануваат тука – и пионерскиот тим на клубот, предводен од Мартин Алаѓозовски, ја освои КУП титулата во својата конкуренција.
Во финалето одиграно на терените на ФФМ во Скопје, тие го совладаа тимот на Пелистер од Битола со минимални 1:0. Пехарот на младите таленти им беше врачeн од членот на Управниот одбор на ФФМ и поранешен фудбалски репрезентативец Агим Ибраими.
Со оваа победа, пионерите ја комплетираа двојната круна – шампионска и куп титула – со што ја заокружија историската сезона за клубот.
Иако кадетскиот состав загуби несреќно во финалето од Шкупи со 2:1, АП Брера Струмица оваа сезона ја заврши со три освоени пехари – два Куп и еден шампионски. Минатата сезона завршија со вкупно четири титули, од кои две Куп и две шампионски, што дополнително ја зацврстува академијата како расадник на фудбалски таленти.
