Ракометниот клуб Вардар добива сериозно засилување на десната бековска позиција. Репрезентативецот на Србија, Урош Митровиќ, во иднина ќе ги брани боите на македонскиот ракометен гигант.
20-годишниот леворак играч доаѓа од францускиот Тулуз, а зад себе има богато меѓународно искуство и настапи во Полска, Австрија, како и во домашниот шампионат на Србија.
Митровиќ ќе биде дел од „црвено-црната“ фамилија најмалку до јуни 2027 година, со што Вардар добива млад и перспективен играч, кој воедно веќе има настапи и во квалификациите за Европското првенство 2026 година со репрезентацијата на Србија.
Во тековната сезона, тој има одиграно вкупно 39 натпревари во клубот и националниот дрес, при што постигна 34 гола. Покрај Тулуз, во кариерата има настапувано за Брегенц (Австрија), Висла Плоцк (Полска), како и за српските екипи Врбас и Црвенка. Има искуство и во Лига Европа, каде неговата екипа стигна до главната фаза.
„Голема ми е чест и задоволство да играм во боите на македонскиот гигант, клуб кој зад себе има неверојатна историја. Во наредните сезони со нетрпение очекувам да го дадам својот максимум и да го покажам сето она на што сум способен на теренот, и заедно со екипата да се претставиме во најдобро светло“, изјави Митровиќ.
