Македонската велосипедистка Дуња Иванова, членка на клубот ВК Енерџи, продолжува да бележи врвни резултати на меѓународната сцена.
Со низа подиуми и високи пласмани на УЦИ маратони низ Европа, таа се искачи на 56. место на светската МТБ Маратон ранг-листа, каде се наоѓаат над 500 од најдобрите велосипедистки од целиот свет.
Овој историски пласман ѝ овозможи на Иванова да обезбеди норма за настап на Светското првенство во МТБ Маратон, кое ќе се одржи од 30 август до 14 септември во Валис, Швајцарија.
Освен на меѓународен план, Иванова викендов оствари уште еден значаен успех – стана државен првак во МТБ Маратон, освојувајќи ја титулата на Националното првенство што се одржа во екстремни услови на планинските патеки во Крушево.
Следниот голем предизвик за оваа талентирана македонска спортистка ќе биде Европското првенство во МТБ Маратон, кое ќе се одржи на 8 јуни во Касела, Италија, каде ќе го брани македонското знаме меѓу најдобрите европски велосипедистки.
Виолета Јанчева, Спортска Мрежа
