Екипа на Арсими од Чегране го постигна најголемиот успех во својата историја.
Во последното, 30-то коло од сезоната во Втората македонска лига, Арсими славеше со убедливи 0-4 на гостувањето кај Вардар Неготино и со тоа го обезбеди второто место на табелата, кое носи директен пласман во Првата македонска фудбалска лига.
Ова ќе биде прво учество за Арсими во елитното друштво на мак-фудбалот. Историски момент, не само за клубот, туку и за целото село Чегране, кое од следната сезона ќе има свој претставник во најсилната лига во Македонија.
Успехот не доаѓа случајно. Тимот покажува континуиран напредок и стабилен раст. Во јуни 2022 година, Арсими како шампион на Трета Лига – Запад преку баражот против Овче Поле се избори за влез во Втората лига. Само три сезони подоцна, тимот под водство на тренерот Вилдан Салиу го прави следниот голем чекор – историски пласман во Првата лига.
Покрај спортските резултати, клучна улога за овој успех одиграа доброто менаџирање на управата, вложувањата во инфраструктурата и создавањето на тим со силен натпреварувачки дух.
Чегране има причина за гордост – Арсими ја отвора новата страница на својата историја, сега како прволигаш.
