Екипата на Кочани е шампион во Втората женска фудбалска лига, откако во последното 14. коло го доби дербито со Вардар со минимални 0:1, благодарение на голот на искусната Катерина Милеска.
Кочани, предводен од Оливер Јовановски, се враќа во Првата женска фудбалска лига, додека Вардар ќе игра бараж за можен влез, па сега ќе се чека разврската во Првата лига – дали тоа ќе биде Речица или Ас Јунајтед.
Кочани стана шампион со учинок од 13 победи и едно реми, притоа тимот имаше постигнато 96 гола, а прими само осум гола или тоа нзачи дека шампионот го имаше најефикасниот напад и најдобрата одбрана во лигата.
Вардар предводен од Теодора Димитровска ќе се подготвува за нов бараж, минатата година вардарски не поминаа преку баражт во Втора лига, а сега поискусни за еден бараж ќе се обидат да обезбедат историски влез во елитата.
Натпреварот започна со една минута молк во чест на загинатите од големата трагедија во Кочани, а фудбалерките на Вардар на теренот излегоа со црни маички во знак на почит кон починатите.
Во Валандово немаше победник, откако Победа и Плачковица ремизираа играјќи 1:1. За домаќинот погоди Викторија Петкова во 33. минута, а за гостите од Радовиш стрелаше Викторија Лазова во 80. минута.
Екипата на Билјанини Извори со убедливи 1:6 го декласираше Порече во Македонски Брод. Стефанија Ристова и Ева Андонова беа двојни стрелци, а по еден гол за охридскиот тим постигнаа Марија Јулчовска и Викторија Стојаноска. За домашниот тим погоди Ангела Наумоска во 76. минута.
На натпреварот во Македонски Брод му беше оддадена почит на Николче Здравески кој ненадејно почина, а беше легендан фудбалер на Победа и остави голема трага и како фудбалер и тренер во мак-фудбалот. Капитенката Јована Ѓорѓиоска Блажеска беше во црна маичка посветена за Здравески.
Вчера, екипата на Слободен со 3:2 го совлада Борец за прва историска победа – извештајот е достапен на Спортска Мрежа.
