Охрид обезбеди пласман на Ф4 турнирот од Купот на Македонија, откако во финалето на групата 4 славеше над Тиквеш со 34:25.
Охрид уште еднаш се покажа како одличен домаќин на групата, но одлично се покажа и на теренот и ја оствари својата прва цел да биде на завршницата на Купот.
Ракометарот на Охрид, Дејан Кукуловски за Спортска Мрежа истакна дека целта била Охрид да биде дел од завршницата од Купот и дека секако таму одат по титула.
„Нашите амбиции се, нормално, да одиме што подалеку, и ако можеме и да го освоиме Купот. Денес беше еден исклучително тежок натпревар, особено првото полувреме беше егал натпревар, но добро, во второ полувреме ги намаливме техничките грешки и гол по гол, полека дојдовме до посакуваниот резултат. Нормално, цел ни беше завршницата на Купот, па сега имаме доволно време да се подготвиме за фајнал фор, нормално, одиме таму како што кажавме- на титула, но полека.. чекор по чекор, па ќе видиме што ќе биде“, рече Кукуловски за Спортска Мрежа.
Охрид одигра одличен меч и буквално во вториот дел го „уништи“ Тиквеш и со тоа „гладијаторите“ патуваат на Ф4 турнирот на Купот на Македонија.
