Поради акумулирани пет жолти картони девет фудбалери од седум екипи го пропуштаат 21. коло на Втората лига.
Поради жолти картони овој викенд односно в недела нема да игра фудбалерот на Башкими, Хебиб Саити на мечот со Вардар Неготино, Христијан Торнески кој настапува за Новаци нема да игра против Беласица, а пак за струмичани поради пет жолти картони нема да игра Мирче Стоилов.
Брегалница на дуелот против Скопје на домашен терен ќе биде без Горан Томовски, Каменица Саса на гостувањето кај Арсими ќе оди без Петар Митревски.
Кожуф в недела ќе гостува во Радовиш кај Детонит Плачковица, а на овој меч тимот од Гевгелија ќе биде без Сашо Дуков и Никола Сарески кои имаат по пет жолти картони, а пак Македонија ЃП на домашен терен ќе игра против Вардарски, но на овој меч за „лавовите“ нема да настапат Ѓорги Стоилов и Јован Попзлатанов.
Натпреварите од 21. коло ќе се играат в недела од 15 часот, а ваквата промена од сабота во недела доаѓа поради репрезентативната пауза.
