Екипата на Брегалница Делчево за пролетната полусезона во Трета лига – Исток ќе има нови четири играчи за вкупно пет, откако претходно како што информираше Спортска Мрежа беше промовиран Јован Дојчинов, кој дојде од второлигашот Осогово. Нови имиња во редовите на тимот од Делчево се Емил Рунчевски, Дени Андонов, Ненад Нешовски и Антонио Стојчов.
Со овие пет играчи екипата на Брегалница Делчево го комплетира ростерот за вториот дел од сезоната, со што се затвара трансфер пазарот во Делчево.
30-годишниот Рунчевски доаѓа од редовите на Овче Поле, претходно беше дел од Детонит Плачковица, Кежовица, Каменица Саса, Баби, а потекнува од Брегалница. Во пакет од Овче Поле од Свети Николе со Рунчевски доаѓа и Андонов, се работи за 29-годишен фудбалер кој има искуство настапувајќи за екипи како Детонит Плачковица, Плачковица, Кит Го од Пехчево, Работнички Џумајлија, Баби, а потекнува исто така од Брегалница од Штип.
25-годишниот Нешовски пристигна од Карбинци, а има настапувано и за Рудар од Пробиштип, Каменица Саса, Силекс и Плачковица. Стојчов, исто така има 25 години и доаѓа од Карбинци, а во минатото беше дел од Рудар, Слога Виница, Чешиново 2015 и Силекс.
Пролетниот дел Брегалница Делчево го отвара на домашен терен против екипата на Тиверија од Струмица, а тимот предводен од Даниел Гоцевски презимува на 4. место на табелата со 16 бодови. Пролетната полусезона ќе започне на 9. март.
