Екипата на Превалец има одлични подготовки за пролетниот дел од Трета лига – Југ, кои започнаа на 26. јануари, а клубот има одиграни и неколку пријателски натпревари преку кои ја проверува формата.
Како што веќе информираше Спортска Мрежа, екипата на Превалец со 6:2 го доби Горски, потоа Превалец беше подобар и од Младост со 5:2, па следуваше нов висок триумф за Превалец против Башкими со 4:1, Превалец го доби пријателскиот меч и со Форца со резултат од 4:2, а вчера со 3:2 Превалец славеше над Еуромилк ГЛ.
За пролетниот дел од сезоната екипата на Превалец се засили со пет играчи како што дознава Спортска Мрежа, а според нашите информации во финишот на преодниот рок ќе биде промовирано уште едно искусно име во тимот.
Клубот се засили со Стојанов Пеце, Ставревски Димче, Петров Павле и Јордановски Александар кои во пакет заедно доаѓаат од второлигашот Борец, како и со Петровски Бране кој доаѓа од екипата на Бабуна.
Во пролетната полусезона главната борба за првото место и со тоа обезбедување на баражот ќе се сведува воглавно на лидерот Големо Коњари и на екипата на Превалец. Екипата на Превалец пролетниот дел од сезоната го отвара на домашен терен против Бучин.
