Екипата на Влазерими од Кичево денес ќе ги започне подготовките за пролетната полусезона во Трета лига – Запад, тимот има една цел – да биде по третпат шампион во овој третолигашки регион и од трет обид преку баражот да дојде до пласман во Втората лига.
Влазерими губи два баражи во низа, пред две сезони од Башкими и лани од Борец и со тоа и натаму е во Трета лига – Запад, затоа и Спортска Мрежа неколку сезони го отвара оваа прашање дека баражите треба да станат минато, а шампионот како шампион треба да има директен влез во повисок ранг на натпреварување во овој случај од Трета во Втора лига.
Како што веќе информираше Спортска Мрежа, екипата на Влазерими се засили со девет нови играчи, односно Ресул Рамадани, Агон Хајредини, Христијан Крклински, Иве Трифуновски, Насаф Шабанов, Сами Аљиљи, Ариф Садики, Егзон Османи и Арбен Бајрами.
Екипата на Влазерими е на второто место на табелата во Трета лига – Запад со четири бодови негатива во однос на лидерот Тетекс, со тоа што „штофарите“ од Тетово кои лани испаднаа од Втора лига имаат меч повеќе во однос на Влазерими. Дополнително, првото пролетно коло го носи и директно дерби на овие две екипи, па првото пролетно коло може да се покаже и како клучно на патот кон обезбедување на баражот за Втора лига.
