Есенскиот шампион во Втората лига, екипата на Македонија ЃП, за пролетната полусезона ќе се засили со Анџело Николовски, дознава Спортска Мрежа.
Штипјанецот во следните денови и официјално треба да биде промовиран како нов играч на „лавовите“, кои сакаат експресно враќање во Првата лига, откако минатата сезона испаднаа од фудбалската елита на Македонија.
23-годишниот фудбалер низ својата кариера има настапувано за матичната Брегалница, Гостивар и Кит Го од Пехчево. Во радовишкиот второлигаш пристигна во август 2023 година и беше еден од носителите во играта на Детонит Плачковица.
Македонија ЃП е на врвот во Втората лига со 38 бодови пет повеќе од Брегалница која е втора. „Лавовите“ важат за први фаворити за враќање во Првата лига.
