Федерацијата на планинарски спортови на Македонија (ФПСМ), преку својот Центар за стручно оспособување, организира серија едукативни предавања посветени на безбедното планинарење во зимски услови, со цел подигнување на свеста и унапредување на знаењата кај планинарите.
Ниските температури, снегот, мразот и променливите временски услови претставуваат сериозен предизвик при планинарските активности, поради што соодветната подготовка, опремата и познавањето на планинските опасности се од особено значење.
Во рамките на предавањата, учесниците имаат можност да стекнат практични и теоретски знаења за планирање планинарски акции, процена на ризиците, правилна употреба на зимската опрема, движење по снег и мраз, препознавање опасност од лавини и донесување одлуки во непредвидливи ситуации.
Од Федерацијата нагласуваат дека едукацијата претставува континуиран процес, без оглед на искуството на планинарите, а стекнатите знаења ќе можат дополнително да се надградат преку зимските обуки што во следниот период ќе ги организираат планинарските клубови.
Поради големиот интерес, ФПСМ најавува дополнителни едукативни предавања во Битола, Куманово и Штип, со што овие активности ќе бидат достапни за поголем број љубители на планинарството низ Македонија.
Федерацијата упати благодарност до предавачите Горан Николоски, Ирена Диков, Александар Стојановски и Бобан Стефановски за споделеното знаење и искуство, како и до сите учесници за покажаниот интерес и активното учество.
„Целта на секоја планинарска акција не е само искачениот врв, туку безбедно враќање дома“, е пораката со која ФПСМ ја истакнува важноста на одговорното и безбедно планинарење, особено во зимскиот период.
