Со цел подигнување на безбедноста на планинарите и намалување на ризиците и несреќите на планините во текот на зимската сезона, Федерацијата за планинарство на Македонија, преку Центарот за стручно оспособување при ФПСМ (ЦСО), организира серија едукативни предавања посветени на безбедното планинарење во зимски услови.
Со доаѓањето на зимата, планините се претвораат во прекрасни, но и исклучително сурови предели, кои бараат посебна подготвеност, соодветна опрема и познавање на предизвиците што ги носат зимските услови. Токму затоа, иницијативата има за цел да им овозможи на планинарите, како на почетниците така и на поискусните, да стекнат клучни теоретски и практични знаења за безбедно движење и справување со опасностите во планината.
Првите две предавања ќе се одржат на 28 октомври и 4 ноември 2026 година, во периодот од 18:00 до 20:00 часот, во зградата на Домот на хуманитарни организации „Даре Џамбаз“, во сала 5 на приземјето, на булеварот „11 Октомври“ бр. 42 во Скопје.
Предавачи ќе бидат Горан Николоски, член на Комисијата за инклузивно планинарење, и Ирена Диков, член на Комисијата за планинарски водичи. Предавањата ќе бидат посветени на безбедноста, логистиката и психофизичката подготвеност неопходни за планинарење во зимски услови.
Од Федерацијата за планинарство на Македонија истакнуваат дека подигнувањето на свеста и едукацијата се важен дел од заедничката одговорност на сите чинители во планинарската заедница, со цел планинарите да бидат подобро подготвени за зимските предизвици и да се намали можноста за несакани ситуации на планините.
Влезот е слободен, но поради ограничениот број седишта, заинтересираните треба да го пријават своето присуство најдоцна до 12:00 часот на 28 октомври 2026 година. Пријавувањето е на електронската адреса contact@fpsm.org.mk или на телефонскиот број 071 41 65 62.
Со оваа иницијатива, Федерацијата за планинарство на Македонија повикува на поголема едукација, одговорност и подготвеност, со заедничка цел планините да бидат побезбедни за сите љубители на планинарењето.
