Младата фудбалска репрезентација на Македонија до 15 години оствари победа од 3:1 против Малта во четвртиот натпревар на Светското првенство во форматот 7+1, кое се одржува во Баку, Азербејџан.
Избраниците на селекторот Горан Станковски одиграа квалитетен натпревар и заслужено стигнаа до нов триумф на турнирот. Иако Малта прва поведе со голот на Деклан Замит во 13. минута, македонските фудбалски надежи одговорија со три погодоци. Доротеј Христов во 24. минута го израмни резултатот, Стефан Стојаноски во 29. минута донесе водство за Македонија, а Дин Рожајац во 32. минута го постави конечниот резултат од 3:1.
Македонија досега има забележано две победи, едно реми и еден пораз на светскиот собир. На стартот од натпреварувањето славеше против Панама со 4:1, потоа загуби од Чад со 1:2, а во третото коло одигра нерешено 2:2 против Кенија.
На македонската селекција ѝ преостанува уште последниот натпревар од групната фаза, во кој ќе се соочи со Нигер.
