Ракометниот клуб Младост 1977 од Богданци продолжува да работи на развојот на младите ракометари, а ракометната школа во Дојран бележи раст и развој, со цел повторно да го врати ракометниот дух во овој град.
Со многу работа, посветеност и љубов кон ракометот, во Дојран се создаваат нови генерации млади спортисти кои ги прават првите чекори во ракометот и го градат својот спортски пат. Посебно значаен момент е тоа што Дојран повторно има свои ракометари кои се натпреваруваат во системот на Ракометната федерација на Македонија (РФМ).
Целта на ракометната школа е да им овозможи на децата правилен спортски развој, да ги запознае со основите на ракометната игра и да ги научи на дисциплина, тимска работа и почитување на вистинските спортски вредности.
Покрај создавањето здрави спортски навики и развивањето на љубовта кон ракометот, амбицијата на клубот е најталентираните деца да добијат можност за понатамошен напредок и еден ден да го носат дресот на Младост.
Растот на школата во Дојран претставува важен чекор во ширењето на ракометот и создавањето нови спортски приказни во регионот. Од клубот порачуваат дека ова е само почеток на еден процес во кој најважни се децата, нивниот развој и иднината на ракометот.
Од Дојран до ракометните терени низ Македонија – се создаваат нови генерации ракометари, со една заедничка цел: развој на младите и враќање на ракометниот дух.
РК Младост 1977 Богданци продолжува со својата мисија под мотото: „Еден живот, една Младост!“
