Женската кадетска ракометна репрезентација на Македонија ги започна подготовките за настапот во Регионалната лига У16. Собирот се одржа денеска, 19 октомври, во спортската сала „Расадник“, со што официјално започнаа активностите во рамките на ЕХФ-неделата.
По собирот, младите ракометарки го одработија и првиот тренинг, а подготовките ќе продолжат во текот на неделата, во пресрет на претстојните меѓународни предизвици.
Во петок, на 23 октомври, по завршувањето на последниот тренинг, македонските кадетки ќе отпатуваат во Верија, Грција, каде што ги очекуваат два натпревари во рамките на Регионалната лига У16. Противници на нашата селекција ќе бидат репрезентациите на Турција и Грција.
Првиот натпревар Македонија ќе го одигра на 24 октомври, со почеток во 14:00 часот, против Турција. Ден подоцна, на 25 октомври, македонските ракометарки ќе се соочат со домаќинот Грција, во средба што ќе започне во 12:00 часот.
Настапот во Регионалната лига У16 ќе биде можност за младите македонски ракометарки да стекнат драгоцено меѓународно искуство, да ги покажат своите квалитети и да продолжат со развојот на репрезентативно ниво.
