По четири одиграни кола во шестте региони на Третата македонска фудбалска лига, полека се издвојуваат екипите кои имаат највисоки амбиции. Иако сезоната е сè уште во раната фаза, дел од фаворитите веќе го потврдуваат квалитетот и се на врвот на табелите, додека кај некои од очекуваните кандидати за највисок пласман има и први разочарувања.
Регион 1 – Илинден максимален
Во Регион 1, Илинден е лидер со максимални 12 бодови од четири натпревари. Зад него е БВК Коњаре со 10 бодови, исто колку што има и Студеничани на третата позиција.
БВК Коњаре се наметнува како еден од посериозните конкуренти на лидерот, додека Студеничани со резултатите во досегашниот дел од сезоната се искачи високо на табелата.
Беса од Сарај е четврта со 7 бодови, додека Њу Старс и Аеродром со по 6 бодови го делат петтото место.
Регион 2 – Куманово со совршен старт
Во Регион 2, Куманово има максимални 12 бодови и четири победи од четири натпревари.
Куманово пред три сезони играше бараж за пласман во Втората лига, но тогаш загуби од Победа. Сега тимот повторно има амбиција да стигне до баражот, но овојпат и да го направи последниот чекор кон враќање во второлигашката конкуренција.
Втора е Пчиња со 10 бодови, додека дебитантот Јуниор од Доброшане пријатно изненадува и моментално е трет со 9 бодови.
Регион 3 – Победа Валандово лидер, Саса и Овче Поле под очекувањата
Во Регион 3, Победа Валандово продолжува во ритамот од минатата сезона. „Калинкарите“ минатата сезона беа на врвот и стигнаа до бараж за Втора лига, каде што загубија со 2:0 од Камјани на Градскиот стадион во Штип.
Сега Победа повторно има големи амбиции и по четири кола е лидер со максимални 12 бодови.
Најпријатното изненадување е Огражден од Ново Село, кој со три победи и едно реми има 10 бодови и се наоѓа на второто место. Малеш е трет со 8 бодови.
Од друга страна, ланскиот второлигаш Каменица Саса има само 6 бодови и се наоѓа на шестата позиција, додека Овче Поле, кое исто така имаше високи амбиции пред стартот, е седми со 5 бодови.
Регион 4 – Победа од Прилеп без грешка
Во Регион 4 засега нема поголеми изненадувања на врвот. Победа од Прилеп е убедлив лидер со максимални 12 бодови, со дури 29 постигнати и само еден примен гол.
На второто место е Венец од Долни Дисан со 10 бодови, додека Превалец и ланскиот второлигаш Големо Коњари се на третата позиција со по 9 бодови.
Регион 5 – Влазерими и Караорман на врвот
Во Регион 5, Влазерими од Кичево и Караорман имаат по 9 бодови.
Стружани имаат одиграно четири натпревари, со три победи и еден пораз, додека Влазерими од Кичево има натпревар помалку и максимален учинок – три победи од три натпревари.
Зад нив следуваат три екипи со по 7 бодови – Баир Спорт, Напредок Кичево и Напредок Ношпал, кои го делат третото место.
Регион 6 – Доброште на врвот
Во Регион 6 лидер е Доброште со 10 бодови, остварени со три победи и едно реми.
Дури пет екипи имаат по 7 бодови и се наоѓаат во густо распоредениот врв – Дрита од Боговиње, Гостивар, Џепчиште, Лирија од Желино и Кораб.
Тоа покажува дека во овој регион допрва може да се очекува голема борба за врвот, со оглед на малата бодовна разлика меѓу екипите.
Само три шампиони ќе стигнат до Втора лига
На крајот од сезоната следува и новиот систем за одредување на патниците кон второлигашката конкуренција. Шесте регионални шампиони, преку ждрепка, ќе бидат поделени во три натпреварувачки пара.
Победниците од трите бараж мечеви ќе обезбедат место во Втората македонска фудбалска лига за сезоната 2027/2028.
Иако се одиграни само четири кола, веќе може да се забележат првите контури на борбата за врвот. Сепак, до крајот има уште многу натпревари, а токму во Третите лиги формата и континуитетот во текот на целата сезона може да направат голема разлика.
