Најдобрата македонска таеквондистка Милијана Рељиќ освои бронзен медал на Албанија Г1 Опен во Тирана, продолжувајќи со одличните настапи на меѓународната сцена.
Рељиќ турнирот го започна со победа во второто коло против канаѓанката Леонарда Ардиќ, која ја совлада со 2:1 во рунди. Македонската таеквондистка потоа обезбеди место во полуфиналето по уште една исклучително неизвесна борба, овојпат против Шпанката Елена Лена Торес.
Мила и во оваа пресметка славеше со 2:1 во рунди, а последната рунда ја доби со минимални 10:9 поени, потврдувајќи ја својата ментална сила и квалитет во клучните моменти.
Во полуфиналето Рељиќ се сретна со Турчинката Хатиџе Пинар Јигинталп. Македонката загуби со 0:2 во рунди, но двете рунди беа исклучително тесни и завршија со идентични 2:4 поени.
Со освоената бронза во Тирана, Рељиќ повторно обезбеди значајни бодови на светската и олимписката ранг-листа. Таа заработи нови 3,60 поени, со што продолжува да ја зацврстува својата позиција меѓу најдобрите таеквондистки во светот.
Очекувањата се Милијана Рељиќ и понатаму да остане во Топ 10 на светската ранг-листа, што е уште една потврда за нејзината константност и квалитет на најголемата меѓународна сцена.
