Петнаесет годишниот македонски тенисер Марко Алексовски продолжува со одличните настапи на турнирите до 18 години. Алексовски оваа недела стигна до двојна титула на J30 турнирот во Улцињ, триумфирајќи во сингл конкуренција и во двојки, каде настапуваше со Црногорецот Скендер Катана.
Во сингл конкуренција, Алексовски во финалето убедливо го совлада Италијанецот Марко Брињоли со 2:0 (6:2, 6:1). Претходно, во полуфиналето беше подобар од Бугаринот Љубен Хубенков со 6:3, 3:0, по што противникот го предаде мечот.
До финалето, македонскиот тенисер во четвртфиналето го совлада Михаил Мичшенко од Казахстан со 2:1 (6:1, 4:6, 6:2), во меч во кој го загуби единствениот сет на турнирот.
Алексовски претходно беше убедлив и во групната фаза, каде ги победи Павле Вукосављевиќ од Србија со 2:0 (6:3, 6:3), Лука Сецански од Србија со 2:0 (6:0, 6:0) и Раз Ти Поска од Италија со 2:0 (7:5, 6:2).
Во конкуренција на двојки, Алексовски и Катана до титулата стигнаа откако нивните противници Никша Смиљаниќ и Немања Тодориќ од Босна и Херцеговина го предадоа финалниот меч.
