Мартин Томовски продолжува да ја потврдува својата одлична форма во Бундеслигата. Македонскиот репрезентативен голман одигра уште еден одличен натпревар меѓу стативите, овојпат против Фуксе Берлин, кој со многу мака стигна до победа на гостувањето кај Битигхајм со 32-31.
По импресивната партија против Магдебург, Томовски повторно беше на висината на задачата во дуел со уште еден тим од самиот врв на германскиот ракомет. Со 14 одбрани им создаваше сериозни проблеми на ракометарите на Фуксе и беше еден од најзабележителните поединци на натпреварот.
Колку беше значајна неговата партија покажува и фактот што на спротивната страна играше еден од најопасните стрелци во светот, Матијас Гидсел, кој натпреварот го заврши со 6 погодоци од 11 обиди.
Томовски од натпревар во натпревар покажува дека може да се носи со најголемите имиња и екипи во Бундеслигата. По Магдебург, сега дојде ред и на Фуксе Берлин да почувствува колку незгоден може да биде македонскиот чувар на мрежата.
Формата во која се наоѓа Томовски е особено впечатлива, а со вакви партии неговото име сè погласно се наметнува во најсилното национално првенство во Европа.
