Некогашниот прволигаш Борец од Велес е подготвен за новата сезона во Трета лига Регион 4. Клубот минатата сезона не успеа да обезбеди промоција во Втора лига откако како шампион на Трета лига – Југ беше убедливо поразен од Кожуф во Кочани.
И во новата сезона велешката фудбалска гордост ќе биде дел од третолигашкото друштво, но според соопштението од клубот, ќе се игра со млади сили и голема мотивација и борба за што повисок пласман.
„Фудбалерите на Борец 1919 АД активно тренираат и се подготвуваат за стартот на новата сезона во Трета фудбалска лига – Регион 4. Со млади сили, голема мотивација, но и добро познати лица во тимот, велешкиот клуб влегува во сезоната со јасна цел – да се одигра што поквалитетно и да се избори што подобар пласман. Тренинзите се одвиваат во позитивна атмосфера, а тимот полека ја темпира формата и составот за првиот натпревар против Млекар“, велат од клубот.
По испаѓање на Борец од Прва лига, клубот не може да се стабилизира. По испаѓање од Прва лига испадна веднаш и од Втора лига со само два бода, потоа успеа експресно да се врати во Втора лига, но по само една сезона одново се врати во третолигашката конкуренција, а минатата сезона не успеа да го помине баражот и втора сезона по ред ќе биде дел од Трета лига.
