Вардар никако да победи во новата сезона, откако во рамките на 4. коло на Првата женска фудбалска лига загуби на гостувањето кај Каменица Саса со резултат од 4:2.
„Рударитеки“ стигнаа до своето второ славје, а пак скопскиот тим запиша четврти пораз од толку натпревари и останува единствениот во шампионатот без бодови.
Ана Димитровска сама го декласираше Вардар откако постигна хет-трик, а еден гол постигна Туане Де Соуза Фрагосо, додека пак за гостинот од Скопје двоен стрелец беше Јулија Живиќ.
Кочани и Ас Јунајтед ги поделија бодовите откако двете екипи ремизираа без голови (0:0). За тимот на Кочани ова е првиот бод сезонава, а пак Ас Јунајтед на своето конто има осум бодови со учинок од две победи и две ремија.
Шампионот Скопје без проблеми ја доби Речица со убедливи 4:0. Ивана Милевска и Тамара Атанасовска постигнаа погодоци за двојна предност на полувреме, а во вториот дел Рабија Дервиши постигна два гола за конечни 4:0.
Пелистер стигна до третата радоста откако славеше на домашен терен со 2:0 над Истатов. По чистите мрежи во првиот дел, во второто полувреме Леонора Велкоска постигна гол во 56. минута за водство на домаќинот, а печат на победата стави Марија Стојановска во 67. минута.
Вонредното коло број четири се затвара утре со натпреварот во Тетово меѓу Љуботен и Тиверија Брера.
