Екипата на ОФС Битола со голем пресврт стигна до победа од 5:3 против ерменскиот претставник Силисија во последното коло од групната фаза на УЕФА Купот на регионите. Со овој триумф, битолчани го освоија третото место во својата група.
Силисија одлично го започна натпреварот и уште во 13. минута преку Георги Костенков дојде до предност. Само осум минути подоцна, Давит Јавријан зголеми на 2:0, а истиот фудбалер во 37. минута беше прецизен од белата точка за убедливи 3:0.
ОФС Битола, сепак, не се предаде и во второто полувреме направи спектакуларен пресврт со пет постигнати голови.
Само две минути по почетокот на вториот дел, Мики Талески го намали заостанувањето, а во 54. минута Лука Лисолајски погоди за 3:2 и го врати македонскиот состав целосно во игра.
Дополнителен проблем за Силисија беше црвениот картон на Гакик Акулјан во 58. минута, по што ОФС Битола целосно ја презеде иницијативата.
Во 74. минута Хакан Алимовски реализираше пенал за израмнување на 3:3, а само четири минути подоцна Лисолајски повторно се запиша во листата на стрелците за целосен пресврт и водство од 4:3.
Конечните 5:3 ги постави Иванчо Јовановски во третата минута од судиското надополнување, со што ОФС Битола ја круниса одличната игра во второто полувреме.
По трите освоени бода, ОФС Битола ја заврши групната фаза на третото место. Првото место го освои Зеница-Добој, која во последното коло убедливо со 4:0 го совлада Тим Рханбартол и Де.
