Охрид и Вардар пристигнаа во Гевгелија каде утре ќе ја имаат првата можност во новата сезона да се борат за трофеј. Салата „26 Април“ ќе биде местото на големата пресметка за Супер Купот, во која „гладијаторите“ ќе влезат со самодоверба по двете претсезонски победи над истиот противник.
Двата состави веќе трипати ќе ги одмеруваат силите во краток период, ако се смета и утрешниот натпревар, бидејќи претходно се сретнаа на завршниците на турнирите во Струга и Охрид. Во двата дуела триумфираше Охрид, но Давид Савревски не очекува тоа да има пресудна улога во мечот за првиот официјален трофеј.
Десниот бек на охриѓани смета дека неговиот тим е подготвен за предизвикот, но потенцира дека конечниот исход ќе го одлучат желбата, борбеноста и она што двата тима ќе го прикажат во сите 60 минути.
„Утре играме Супер куп против екипата на Вардар. Мислам дека сме во добра натпреварувачка форма, но сепак, утре нè очекуваат 60 минути борба. Мислам дека нема фаворити на теренот, а ќе победи оној кој повеќе ќе го посакува триумфот и кој ќе покаже повеќе во текот на натпреварот“- изјави Савревски.
Супер Куп пресметката меѓу Вардар и Охрид започнува утре од 19:00 часот во „26 Април“ во Гевгелија. За арбитражата се задолжени Исмаил Металари и Ненад Николовски, а победникот ќе го освои првиот трофеј во новата сезона.
