Одличен старт на новата сезона во германската Бундеслига имаше македонскиот репрезентативец Мартин Томовски, кој со своите одбрани беше еден од клучните фактори за гостинската победа на Битигхајм над Вецлар со 35-33.
Повратникот во елитното германско натпреварување стигна до првите два бода на тежок терен, а меѓу најзаслужните за успехот се најде токму македонскиот голман. Томовски ја продолжи одличната форма од финишот на минатата сезона и уште на стартот покажа дека ќе биде важна алка во составот на Битигхајм.
Репрезентативниот чувар на мрежата натпреварот го заврши со 15 одбрани, со успешност од 31%. Во голгетерскиот дел од задачата предничеше Ларсон со девет погодоци, додека Херман придодаде уште пет.
Со овој триумф, Битигхајм на најдобар можен начин го означи своето враќање во германската ракометна елита.
