По поразот од Вардар, Силекс се враќа на домашен терен, каде што го пречекува составот на Шкендија, со желба да се рехабилитира и да се врати на победничките патеки.
Кратовци ги очекува најголемиот предизвик на домашен терен, бидејќи за противник го имаат тимот на Шкендија, кој во досегашниот дел од сезоната има максимален ефект. Сепак, од таборот на Силекс владее оптимизам дека со добра игра, дисциплина и максимален ангажман можат да дојдат до позитивен резултат и да освојат бодови против лидерот.
„Очекувам квалитетен, тактички и борбен натпревар. Шкендија е една од најквалитетните екипи во Македонија и имаат максимален ефект на стартот на првенството. Но, ние играме на домашен терен и ќе го дадеме максимумот за бодовите да останат во Кратово. Силекс ќе се потруди да го игра својот стил на игра и да се надигрува со Шкендија. После поразот од Вардар сме малку разочарани, но нема да дозволиме тоа да ни ја наруши атмосферата. Напротив, треба повеќе да не зближи како екипи, но тоа е зад нас и сега треба да се фокусираме кон следните предизвици и да дојдеме до бодови со Шкендија“, изјави Донов.
