Во село Ораовица, Радовишко, вечерва успешно се одржа спортскиот настан посветен на промоцијата и развојот на женскиот фудбал, кој испрати јасна порака дека фудбалот е спорт за сите девојки кои сакаат да тренираат, да се дружат и да започнат ново спортско поглавје.
На фудбалскиот терен во Ораовица, под рефлектори, настапија околу 40 млади фудбалерки, кои имаа можност да одиграат неколку меѓусебни пријателски натпревари. Се играше секој со секого, а резултатите беа ставени во втор план. Најважно беше секоја девојка да добие минутажа, да игра и да ужива во фудбалот.
За дел од учесничките ова беше и прв фудбалски натпревар. Тие ги направија првите чекори на теренот, се запознаа со основните правила на играта и го почувствуваа натпреварувачкиот дух.
Настанот покажа дека кај девојчињата од општина Радовиш и општина Конче постои сериозен интерес за фудбалот. За дел од нив ова беше можност да покажат дека сакаат еден ден да заиграат и професионално, додека кај други најважни беа љубовта кон спортот, дружењето и желбата да бидат дел од фудбалска средина.
Поддршка на настанот дадоа и фудбалерките од ЖФК Тиверија Брера од Струмица со што младите девојки имаа можност одблиску да се запознаат со можностите кои ги нуди женскиот фудбал.
На трибините и околу теренот имаше и публика која дојде да го проследи настанот и да им даде поддршка на младите фудбалерки. Така, Ораовица вечерва беше место каде што спортот, дружењето и женскиот фудбал беа во центарот на вниманието.
- Голем интерес за OHRID WOMEN’S CUP
Вечерашниот настан дополнително го потврди интересот за учество на OHRID WOMEN’S CUP, првиот меѓународен турнир за млади фудбалерки кој ќе се одржи на 5 и 6 септември во Охрид.
На турнирот ќе можат да настапат девојки родени во 2012, 2013, 2014 и 2015 година, а за девојките од Радовиш и Конче ова ќе биде одлична можност за ново фудбалско искуство.
OHRID WOMEN’S CUP ќе биде повеќе од обичен турнир – еден вид фудбалски камп и можност за селекција, каде што дел од девојките можат да го привлечат вниманието на клубови и да направат чекор кон организирано тренирање и натпреварување. За други, пак, турнирот ќе биде можност да стекнат дополнително искуство, нови пријателства и незаборавни спомени.
За сите учеснички е обезбедено сместување, ручек и вечера во сабота (5 септември), појадок во недела (6 септември), како и ланч-пакет по завршувањето на турнирот.
Покрај натпреварите, девојките ќе имаат и слободно време за прошетка низ Охрид, дружење, плажа и капење во Охридското Езеро.
Сите заинтересирани девојки од општина Радовиш и општина Конче можат да се пријават на:
📞 078 646 698 – Александар
Вечерашната слика од Ораовица покажа дека интерес има. Сега останува тој интерес да се претвори во нови фудбалски приказни, нови клубови и нови девојки кои ќе го засакаат фудбалот.
